گوزلری فتان گوزل :الیاس امیرحسنی

"گوزلری فتان گوزل
درده درد قاتان گوزل
الیندن هارا گئدیم
بیزه شر ساتان گوزل"

گوزلری فتان گوزل
قاشلاری چاتان گوزل
اغیارا کونول وئرن
بیزه داش آتان گوزل

گوزلری جیران گوزل
من سنه حیران گوزل
هرنه سوز منه دئدین
هامیسی یالان گوزل

گوزلری مارال گوزل
دریای آرال گوزل
منی گورنده گوزل
قاچگونان تارال گوزل

گوزلری قارا گوزل
گئدیری هارا گوزل
او قشنگ ساچلارونی
قارشومدا تارا گوزل

گوزلری ماوی گوزل
قولاغون  تاوی گوزل
سنی گورنده گئدر
آغزومون چاوی گوزل

گوزلری بادام گوزل
قادایی آلام گوزل
ایستیرم بیر گون گلم
یانویدا قالام گوزل

گوزلری یاشیل گوزل
پاشنه سی آشیل گوزل
محبت بولاغی اول
دولگونان داشیل گوزل

گوزلری تیله گوزل
یوخودور شیله گوزل
اونی من قوجاخلیام
گوزیاشوم سیله گوزل

گوزلری خومار گوزل
الینده انار گوزل
هریئرده منی گورر
گوزلرین یومار گوزل

گوزلری کهر گوزل
قیمتلی دگر گوزل
اخمینن منه باخما
منه تئز دگر گوزل

گوزلری شراب گوزل
ایله دین خراب گوزل
گوزلریندن وئر اوپوم
اولموشام کاباب گوزل