خرقان :الیاس امیرحسنی

دوشدوم یولا گئنه گئدم وطنه
اریک لری گئنه یئره النه
ای منیم گوزوم وطنیم خرقان
آنا یوردوم سنه سلام خرقان

اوّل گوردوم ورده نی داغ دوشنده
لاله کان دا یاتوب اونون قارشونده
ای منیم شیرین وطنیم خرقان
آنا یوردوم سنه سلام خرقان

خان آبادا گلدیم چاتدوم یئتیشدیم
اوردا گئتدیم ایکی قورتوم سو ایچدیم
ای منیم گولوم وطنیم خرقان
آنا یوردوم سنه سلام خرقان

خان آباد دان صورا سید آباد دور
سید لرین اوردا ایشی آزاد دور
شکر نباتوم وطنیم خرقان
آنا یوردوم سنه سلام خرقان

گَله گله چاتدوم کند ویدره
کیم گئده بولاغ اوتی اوردا دره
چشمه بولاغوم وطنیم خرقان
آنا یوردوم سنه سلام خرقان

ویدرلی لر تورک دییل لر تات دولار
پولودولارچوخ بئله راحات دولار
داغلاری معدن وطنیم خرقان
آنا یوردوم سنه سلام خرقان

امامزاده قاسم ویدرده اولار
پنج شنبه لر تپه آدامدان دولار
زیارتگاهلی وطنیم خرقان
آنایوردوم سنه سلام خرقان

ویدردن سورا چاتاروک ویسمیه
ویسملی جان قوربان اولوم رسمیه
باغلاری قوزلی وطنیم خرقان
آنا یوردوم سنه سلام خرقان

بندامیر البته که خان کندی دیر
سدی گوزل بندا میرین بندی دیر
گوزل مارالی وطنیم خرقان
آنا یوردوم سنه سلام خرقان

کمالی نین روحی خودا شاد اولسون
بندامیرین هریئری آباد اولسون
گولی چیچک لی وطنیم خرقان
آنایوردوم سنه سلام خرقان

بولباند خرقانون لوس آنجلیسی
مات اویناتان آروادی وکیشی سی
قه قه وچه چه وطنیم خرقان
آنایوردوم سنه سلام خرقان

بولباندی گئچدیک چاتاروک رازقانا
مرکز بخش اوخشوری گولوستانا
مهر و وفالی وطنیم خرقان
آنایوردوم سنه سلام خرقان

بویان طرفده بره مین دایانوب
صبح سحردن هامیسی اویانوب
صلح وصفالی وطنیم خرقان
آنا یوردوم سنه سلام خرقان

ازبیزاندان شبیه سسی گلیری
شمشیرلری قالخانلارا دگیری
سسین اوجادور وطنیم خرقان
آنایوردوم سنه سلام خرقان

ایکی قدم اوده نَه ها چلیسبان
آداملاری موسلمان اهل عرفان
اینجی قارالی وطنیم خرقان
آنا یوردوم سنه سلام خرقان

ابوالحسن خان ائوی یادش بخیر
شیرین اوزوملر ،مئوی یادش بخیر
ائولریز آباد وطنیم خرقان
آنایوردوم سنه سلام خرقان

دونک گئدک شهریمیزه رازقانا
اوردان گورک چیخک گئدک هایانا
هاموارالی دور وطنیم خرقان
آنا یوردوم سنه سلام خرقان

ایکی قدم بو یاندا عباس آباد
آداملاری یئدی دولت دن آزاد
جان جیگریم دیر وطنیم خرقان
آنا یوردوم سنه سلام خرقان

گئدیم چاتدوم سرزمین الویره
الویر ما امامزاده هم دیره
ادب فرهنگ لی وطنیم خرقان
آنا یوردوم سنه سلام خرقان

الویرلی لر بیر بیرینی ساخلاتور
ایشده اولا بیری چوخون آپارور
کوچه باغلی دوروطنیم خرقان
آنا یوردوم سنه سلام خرقان


الویردن گلک کبود کمره طرف
اوردا گوررسن هر پیشه حرف
دولی ماشون دور وطنیم خرقان
آنا یوردوم سنه سلام خرقان

کبود کمر دن بویانا میل اولار
میلده آدام یاقچی رفیق لر تاپار
منیم رفیق لروطنیم خرقان
آنا یوردوم سنه سلام خرقان

میل دن سورا موسی آباد کندی دیر
مشهد یاری اورانون ارجمندی دیر
فری فراوان وطنیم خرقان
آنا یوردوم سنه سلام خرقان


گئده گئده آفتافورا چاتاروک
کره پنیر خاماتی دا آلاروک
حشم چوخ اولسون وطنیم خرقان
آنا یوردوم سنه سلام خرقان

باغوشلا سلطان دوست منی باغوشلا
حلال ائله بیزی سوگوشه قوشما
ای سنه قوربان وطنیم خرقان
آنا یوردوم سنه سلام خرقان


آفتافوردان قییتمیشم گلمیشم
بیر دانا من دوراهویا چاتموشم
یولاری قارلی وطنیم خرقان
آنا یوردوم سنه سلام خرقان

دوراهودان گیچدیم چاتدوم آجانا
وقت ایستیری آدام گله دولانا
دینلی ایمانلی وطنیم خرقان
آنایوردوم سنه سلام خرقان


آجاندان بئله عین آبادی گوردوم
ساخلادوم اوردا سنی ده چاقوردوم
چایلی وارخلی وطنیم خرقان
آنا یوردوم سنه سلام خرقان


گلدیم چاتدوم منجیقانون کندینه
حیرانام او بیره لی لبخندینه
ماغاری وار دور وطنیم خرقان
آنا یوردوم سنه سلام خرقان


خوب ایندی گئدک هارا جان دوزجه
مجتمیه ،مسجدینه ،کالجه
ادبلی کندیم وطنیم خرقان
آنا یوردوم سنه سلام خرقان

سلام اولسون بوردان سنه میصیرقان
من گلیرم حاضیرلا کورسی یورقان
تحفه جانومدور وطنیم خرقان
آنا یوردوم سنه سلام خرقان

حاج اکبرین شعرلرینه چوخ سلام
فیضیمی من گرک بوخاندان آلام
ای برکتلی وطنیم خرقان
آنا یوردوم سنه سلام خرقان


چاتدوم ایندی لارون سد وبندینه
بوردان سورا گئدم لارون کندینه
سویون چوخ اولسون وطنیم خرقان
آنا یوردوم سنه سلام خرقان


لاردان سورا چناقچویا گلمیشم
گئدم بیر آز کلیسادا ایله شم
آبشارونا باخ وطنیم خرقان
آنا یوردم سنه سلام خرقان

چیخدیم گئتدیم بویاندا چوخ اوزاقا
چاتدوم بیر بالاجه کند ،آق  بولاقا
چینار اوجالی وطنیم خرقان
آنا یوردوم سنه سلام خرقان

بئله بیل کی چاتموشام اوز کندیمه
چارحده باخ ،قجیره باخ کیف اله
 نر اولنی وار وطنیم خرقان
آنا یوردوم سنه سلام خرقان

سید علی اصغرینن رفیقم
اونون الینده آقاجام چیبیقم
هنروری وار وطنیم خرقان
آنا یوردوم سنه سلام خرقان


وداع ائتدیم چهارحدن قئییتدیم
دوزکده بیر دوراهیه یئتیشدیم
درمانگاهی وار وطنیم خرقان
آنایوردوم سنه سلام خرقان


گوردوم ورامه سدینی یولومدا
گوزل لره اوزوم فدا اولومدا
جنگلی واردور وطنیم خرقان
آنایوردوم سنه سلام خرقان


ورامه نی گئچدیم حصار ه چاتدوم
سیفعل عمی گیلده گئتدیم اتوردوم
نه چون گوزل دیر وطنیم خرقان
آنا یوردوم سنه سلام خرقان


حاصاردان چیخدیم بویانا آدرامند
اولماسون هئچ کس الهی مستمند
شیرین عسل دیر وطنیم خرقان
آنا یوردوم سنه سلام خرقان

آدرامنی قویدوم گلدیم بویانا
آدام گرک بو یئرلری دولانا
داغ داشی چوخ دور وطنیم خرقان
آنا یوردوم سنه سلام خرقان


گلدیم چاتدوم بویوک کنده علیشار
غیرت غیرت اوستوندن بوردا آشار
شهیدلری چوخ وطنیم خرقان
آنا یوردوم سنه سلام خرقان

علیشار دان بویان سولی دره دیر
امیر آباد آدلی دولی کره دیر
شیر ژیان دور وطنیم خرقان
آنا یوردوم سنه سلام خرقان


گرکباغی قالوب فقط بویاندا
قزوینه نزدیک اولوری اویاندا
ببر بیان دور وطنیم خرقان
آنا یوردوم سنه سلام خرقان


دوشدوم یولا گرکباغی دان گلدیم
امیر آبادا دوبارا یئتیشدیم
وسعتی چوخدور وطنیم خرقان
آنا یوردوم سنه سلام خرقان

ایندی گلیب چاتموشام آیری کنده
سیدلرین کندی یانی ورچنده
اهل شریعت  وطنیم خرقان
آنایوردوم سنه سلام خرقان

ورچندی گئچدیم بویانا تیره دیر
محبت اوردا هرزادا چیره دیر
اهل حقیقت وطنیم خرقان
آنا یوردوم سنه سلام خرقان

آخوردا قالدی چناقچی سفلی
یورولموشام من گله لی بو یولدا
اهل طریقت وطنیم خرقان
آنا یوردوم سنه سلام خرقان

یئتیشدی سونا بو سفرنامه میز
واردی گئنه بیر آیری برنامه میز
الیاسی واردور وطنیم خرقان
آنا یوردوم سنه سلام خرقان